კერძო სამართლის ტესტები

რწმუნებულს მარწმუნებლის მითითებით დავალებული მოქმედების შესრულებისას მიადგა ზიანი, რაც გამოწვეული იყო ამ მოქმედების შესრულებასთან დაკავშირებულ მნიშვნელოვან საფრთხესთან. დაეკისრება თუ არა მარწმუნებელს ზიანის ანაზღაურება?

კრედიტორმა ერთ-ერთ სოლიდარულ მოვალეს შეატყობინა, რომ ვალდებულებას წყვეტს ვალის პატიებით. სხვა რაიმე დათქმას ადგილი არ ჰქონია. მოგვიანებით მეორე სოლიდარულ მოვალეს მოსთხოვა ვალის გადახდა გათავისუფლებული მოვალის წილის გამოკლებით. კანონიერია თუ არა კრედიტორის მოთხოვნა?

შპს „განთიადმა“ ცნობილ მხატვარ მ. შონიას შეუკვეთა ნახატის „კავკასიონის მთების“ შექმნა. ნახატის დასრულებამდე მხატვარი გარდაიცვალა. საზოგადოებამ ვალდებულების შესრულება მოსთხოვა შონიას ვაჟს, ასევე მხატვარს ე. შონიას. კანონიერია თუ არა საზოგადოების მოთხოვნა?

ვალდებულების შესრულების ვადის დადგომისას კრედიტორის ადგილსამყოფელი უცნობი იყო და მოვალემ მოახდინა შესრულების საგნის დეპონირება ნოტარიატში. სამი წლის განმავლობაში კრედიტორმა საგანი არ მიიღო. მოვალემ მოითხოვა ნივთის მასზედ გადაცემა, რაზეც უარით უპასუხეს. კანონიერია თუ არა მოვალის მოთხოვნა?

ბერიძემ ფირმა „სტილს“ შეუკვეთა წაბლის ხის 12 სკამი და მაგიდა. დაკვეთა თავისი მასალით შეასრულა ფირმის მიერ სპეციალურად მოწვეულმა ლომინაძემ. რადგან შესრულებული ნაწარმი საკმაოდ უხარისხო გამოდგა, შემკვეთმა მოითხოვა ზიანის ანაზღაურება, რაზედაც ფირმა „სტილმა“ უარი განაცხადა. კანონიერია თუ არა „სტილის“ უარი?

მოვალემ ვალდებულება ვერ შეასრულა იმის გამო, რომ ნორმატიული აქტის საფუძველზე, ხანგრძლივი ვადით აიკრძალა ექსპორტი. კრედიტორმა აღნიშნული მიიჩნია სახელშეკრულებო ვალდებულებების დარღვევად და მოვალისაგან, როგორც ვადის გადამცილებლისგან, მოითხოვა ზიანის ანაზღაურება. კანონიერია თუ არა კრედიტორის მოთხოვნა?

რომელი გარემოება იწვევს ხანდაზმულობის ვადის შეჩერებას?

დაუძლეველი ძალის გამო, კრედიტორმა ვერ შეძლო მოვალესთან დანიშნულების ადგილზე მისვლა და გადააცილა მოვალისაგან ფულის მიღების ვადას. იმის გამო, რომ კრედიტორის ბრალი გამოირიცხა, ამ უკანასკნელმა მოვალისაგან მოითხოვა ფულადი ვალდებულებისათვის პროცენტის მიღება. რაზედაც მოვალემ უარი განაცხადა. კანონიერია თუ არა მოვალის უარი?

აბაშიძემ თბილისის ერთ-ერთ მარკეტში მოინდომა დაბადების დღისთვის 20 ბოთლი წითელი ღვინის შეძენა, მაგრამ უარი მიიღო. მარკეტის ხელმძღვანელობამ უარი იმით დაასაბუთა, რომ მყიდველი საქართველოს მოქალაქეა, ხოლო სავაჭრო ობიექტი ემსახურება მხოლოდ უცხო ქვეყნის მოქალაქეებს. კანონიერია თუ არა მარკეტის ხელმძღვანელობის უარი?

ძმებს შორის დაიდო ხელშეკრულება, რომლითაც ერთი ძმა კისრულობდა ვალდებულებას, რომ მამის გარდაცვალების შემდეგ, მამის ქონებიდან მემკვიდრეობით მიღებულ წილს მიჰყიდიდა მეორე ძმას. დამ დააყენა ძმებს შორის დადებული ხელშეკრულების ბათილობის საკითხი. კანონიერია თუ არა დის მოთხოვნა?